تكتكة صوابع
1- ما يحدث من يوم 25 يناير حتى يومنا ثورة بالكلمة والفعل.
2-لا يوجد ما يسمى ثورة يومين او ثلاث او اربع او خميس او جمعة .
3-المتسبب من حالة الانقسامات المتكررة فى صفوف من قاموا بالثورة هو عدولها بالطبع.
4-قلت من قاموا بالثورة نعم لان الثورة لم يقوم بها جميع فئات الشعب بل من يؤمنون بها فقط .
5- سيبك من اللى بيقول ان الثورة بدءها الشباب وحماها الجيش
(الثورة بدءها الشباب وانضم اليها اصحاب المصالح المعارضين السابقين وحماها الخائف على نفوذة من الضياع )
6-اه موضوع الفزعات وعجلة الانتاج والحوار الوطنى والوفاق الوطنى ده كلة على فشوش بس الصبر شوية .
7-الازمة الاقتصادية التى تمر بها البلاد اكتر جملة بكرها فى حياتى ده على اساس انه مكنش فى ازمة قبل كده فى مصر ولا فى العالم كلة .
8-فلول النظام السابق والبلطجية فزاعة محدش واخد بالة منها خالص اليومين دول كل واحد عاوز يعمل حاجه اول سبب تسمعة علشان فلول النظام السابق والبلطجية ميرجعوش يمسكوا الحكم.
9-فى بلطجية اه فية ......فى اخوان عاوزين يمسكوا الحكم اه فى .......فى سلفين طلعوا من الجزر المنعزلة بتاعتهم اه فى ....
فى فى فى عد لحد الصبح ...طبيعى جدا على فكرة ده يحصل .
10-استمرار لمسلسل (فى ) فى علمانيون كفرة اه فى ....بس برضه زى ما فى اسلاميون منافقون ....
وفى برضة علمانيين مسلمين وليبرالين مسلمين واخوان ملسمين
كل ده من اجلك انت ......... يانهاااااار اسود.
ندخل فى الموضوع احسن
فاصل اعلانى
بايخ جدااااااا
(انا كنت جزء من النظام ...كنت جزء علشان كنت عارف انه فى فساد وكنت ساكت
بس دلوقتى انا بقيت النظام كلة
مصر بتتغير بس فى الاعلانات فقط )
الخزعبلات الاربعة عشر
اول حاجة جت فى دماغى اول ما سمعت عن موضوع الصفقة دية ما بين الاخوان والمجلس العسكرى
هى لية ؟
اكيد الكلام ده كدب .الاخوان فصيل سياسى مهم فى البلد انت ناسى هما عملوا ايه للثورة دول حموا الميدان
يوم معركة الجمل ده د/عصام العريان بيقول انه الادمن التانى لصفحة خالد سعيد اخونجى
ده شبكة رصد اللى بتنقل اخبار الثورة تبع الاخوان ده ده ده
اه دول مش عاوزين الحكم ولا عاوزين رئاسة ولا الكلام الفاضى ده
ياعم دول بيقلك (نحن نحمل الخير لمصر) دول ناس محترمة ولا ايه
طب جميل قلت اتاكد بقا من شوية المعلومات دية
1-الذى حما الميدان فى اول موقعة الجمل كان التراس الاهلى والزمالك ثم تبعهم جميع شباب الثورة الذى منهم بالطبع اخوان
2-شبكة رصد اثبت انها تروج لفكر الاخوان فقط لاغير وعندما اختلفنا معهم فى النزول الى الميدان يوم 27
عملوا عبدة العبيط ومن بنها وصور الميدان قبل صلاة الجمعة هما مكدبوش اما قالوا ان ده الميدان يوم 27 لكن كعادة الاخوان الكلام يحمل اكثر من معنى .
3-اما بقا حكاية انهم مش عاوزين يمسكوا الحكم فأظن انه حكاية نسبة 50% فى البرلمان اللى قابلة للزيادة على فكرة ديه بتقول ان الاخوان خلاص قرر ان نظام الحكم فى مصر يكون برلمانى
بسسسسسسسسس لحد هنا قف يا عم الحاج
انت بتقول اى كلام على فكرة!!!!!!!!
هما الاخوان هما اللى بيقررو .ازى؟
.يا جدعان هتجنن أجبنى يمين يجلى شمال أجبنى شمال أجينى يمين
.المهم
قرءات تدوينة لمدون بصراحة مش فاكر اسمة ولا اسم المدونة ومش هدور لانى تعبان جدااا جداا
الخلاصة بقا فى التدوينة ديه بتقول الاتى :
1-هو استعجب ان المجلس العسكرى ركز فى اول قرارات بعدم نقض اى من المعاهدات والاتفاقيات الدولية
جميل جدا وكلنا دماغنا راحت لكامب ديفيد علشان الاخوة الاعداء اليهود.
2-حكاية ان امريكا هددت بقطع المعونة بتاعتهم وانا بصراحة نفسى يقطعوها .المعونة دية فيها جزء عسكرى على فكرة .
3-سألت صديق لى كان ضابط سابق فى الجيش هى الدبابات اللى بنتصور عندها ديه هى اللى بتحارب ؟
الاجابة كانت نعممممممممممم !!!!!!!!!!!
امال فلوس المعونة اللى ذليينا بيها ديه بتروح فين ؟ فين السلاح
انا شوفت قوة الجيش المصرى فعلا اما نزلت كتيبة كاملة علشان عشرة خمناشر ظابط قرروا يقولوا لا .
عرفت فلوس المعونة بتروح فين ؟
4-لعبة الاستفتاء اللى حصلت واللى بطبيعتها محدش استفاد من اللى قالو (نعم) ولا اللى قالوا( لا) منها خالص
غير ان المجلس كان بيوزنا بس بيشوف مين فينا اللى يقدر يحرك الشارع معاه الاسلاميون ولا الليبرالين
وبعد كده عمل اعلان دستورى بحاجه وخمسين او وستين مادة مش فاكر بصراحه محدش فينا قال رئية فيهم
(ديمقراطيه برضه )
5- الاشاعات اللى مالية البلد وسبحان الله كلها اخبار تنرفز جدااا جدااا جدااا
مين بقا اللى بيعملها ....الاجابة ؟ تسمع عن حاجه اسمعا جس النبض وبلونات الاختبار .
6-احنا ناسين حاجه مصلحة امريكا فى المنطقة وحفاظها على الامن القومى لدولة اليهود.
هى مش الثورة بتهدد الكلام ده ولا ايه!!!!!!!
يبقى اكيد امريكا بتحاول تضغط على المجلس العسكرى
علشان مثلا مثلا يعنى واحد زى نبيل العربى (اسف على اللفظ )ياخد شلوت لفوق ويحطوه فى الجامعة العربية اللى ملهاش اى لزمة فى الدنيا .واما لقوا ان فى ناس فهمتها .اجل يحط وزير خارجية تانى لحد ما يشفلنا حاجه نتلهى فيها اهم وغالبا هيكون ايام الانتخابات .
7-الحديث عن النموذج التركى فقط عندما يتولى الاخوان الحكم
طب ليه مش بيقلوا عن النموذج السودانى المحمص الحلو ده اللى اتقسم نصين مهو عمرو البشير اخوان برضه ولا ايه ؟
8- سيادة اللواء ممدوح شاهين طلع قال تصريح غريب كده شوية وهو ان الجيش يجب ان يكون له وضع خاص فى الدستور
يعنى ايه الكلام ده يعنى الجيش يا ولاد هيبقى دولة جوا الدولة .يعنى مش هنعرف ميزانية القوات المسلحة المصرية كام ؟
ينهار اسود انت عاوز تعرف ميزانية الجيش؟ هتروح فى ستين داهية !!!
يعنى محدش هيقدر يقلهم انتوا بتعملوا ايه ولا بتصرفوا الفلوس ديه فين ولا رئيس الجمهورية نفسة اللى هيبقى سلطاتة صورية فقط لاغير .والحجه هتبقى واضحة وجملية وهى لدواعى امنية .
فعلا نموذج تركى تركى بس طعمه حادق على فكرة لان الجيش فى تركيا فعلا كده واما حصل الموضوع بتاع اسطول الحرية ده
الجيش التركى لم يفعل شئ واليهود كانوا عارفين كده كويس علشان كده عملوا عملتهم بقلب جامد مع انهم اجبن مخلوقات الارض. اما الدولة البرلمانية فهددت وشجبت و....و...و.. الخ
9-لماذا يصر الاخوان الملسلمين والمجلس العسكرى بالتصدى لكل من تسول له نفسة بالمنادة بعمل دستور جديد للبلاد قبيل الانتخابات ؟
10-لماذا يصرون على ان مجلس الشعب القادم اللى هو هيكون غير ممثل للشعب بوضع الدستور جديد للشعب برضة
11-لماذا كل يوم نجد حالة اعتقال لاحد الشباب المشاركين فى الثورة ويقدمون للمحاكمات العسكرية فى حين ان البلطجية ومنتفعى النظام السابق ورموز النظام السابق يعيثون فسادا فى الارض .
12- دعوة المجلس العسكرى للحوار مع الشباب فى مسرح الجلاء ما هو الا عبارة عن مسرحية اجلاء للشباب عن دورهم فى الثورة وتكريس لسياسة الانقسام داخل كل من اتحد وقام بالثورة .
14-على فكرة انا كتبت 14لان فى نقطة كلنا عارفنها ومينفعش نتكلم فيها دلوقتى خالص .هبقى اتكلم فيها بعدين
من الاخر انا مش عارف عنوان المرحلة اللى احنا فيها انتقالية ولا ثورية ولا فضائية وبطخية ولا ايه بالظبط
المرحلة بدون خطط واضحة
المرحلة بدون عنوان واضح ....
